沒有封好雪櫃裡面嘅食物包裝,放得耐令唔同氣味混合起來,
就會散發出一陣異味(甚至臭味!)。
定時清潔雪櫃、使用活性碳除臭劑,都係方便有效嘅解決辦法;
但想更慳錢更環保的話,不如試下用呢三類物品代替!
過期麵包
雪櫃入面放檸檬和橙,係其中一種辟味方法。除此之外,麵包都可以!
放入雪櫃,佢自然會吸走雪櫃內異味。記得係用過期或烘燶麵包,新鮮麵包梗係留返黎食啦!
茶葉
將用過嘅茶包放入鞋中,能夠吸去臭味,呢個原理一樣可應用於雪櫃:
將用完嘅茶葉曬乾,放碟上或裝入紗袋置雪櫃嘅風口位。
每隔一段時間,將茶葉拎出黎放於陽光下曝曬,又可以重新使用。
聽聞全新茶葉都能夠吸味,不過始終係用過嘅茶葉更環保!
咖啡渣
原來咖啡渣都得喎!
等咖啡渣完全乾燥後,用盒或碟盛載放入雪櫃,同樣吸到臭味,
擺得耐,雪櫃裡面仲可能有陣淡淡咖啡香氣!
另外,廚房經常備有嘅材料如醋、黃酒、梳打粉,都係天然除味劑黎架!