成世人去咗台灣幾多次,數數手指都超過三十次喇,點解去得咁密?好多朋友都以為我牛郎匯織女/仔,鬼馬香港嗌單身,去到台灣就甜甜蜜蜜,我都想,不過唔係咁囉!
實情係十幾年前已經愛上了台灣嘅味道,尤其係古早味!或者因為台灣業主比香港嗰班食人唔Lur骨嘅收租佬有人性,好多食店都可以一代傳承一代咁經營落去,食客又唔會貪新忘舊。
好想食關東煮呀,最衰香港7仔無!正宗嘅我唔識煮,今次我用亂嚟方法做呢個疑似關東煮,大家又不妨試試啦!
【材料】
其實都幾適隨尊便,不過一定要有大根,即係蘿蔔,同埋獅子狗卷魚餅等日式麵粉美食。至於調味,我就用咗日本隔離嘅韓國辣醬同麵豉醬,仲有香港代表蠔油同生抽,唔正宗?你去日本食啦~
白蘿蔔 1/2條(300克) 小甘筍 1條(100克) 雞肶菇 2隻(150克) 已浸發香菇(切件) 4隻 迷你獅子狗卷 適量 白肉魚餅 適量 薑 3片 蒜頭(切幼粒) 3粒 乾蔥頭(切片) 1粒 芫茜 1棵
韓國辣醬 2茶匙 韓國麵豉醬 2茶匙 蠔油 1茶匙 生抽 1茶匙 冰糖 15克 胡椒粉 少許
【做法】
1.雞肶菇切厚片,一邊鎅十字花,平底煎鑊不用下油,直接放雞肶菇,煎至金黃色盛起,備用。
2.白蘿蔔、小甘筍切件,記得唔好太大件呀。
3.易潔小鍋中火燒熱,下油落薑片、蒜頭、乾蔥頭爆香。
4.再落白蘿蔔、小甘筍及香菇炒香。
5.落調味料繼續炒勻。
6.雞肶菇好容易出水,所以留待最後先放。
7.落雞肶菇後再炒一陣,便可加入清水至材料表面,加蓋煮至滾起,轉細火。
8.燜煮15分鐘後,可加入迷你獅子狗卷及白肉魚餅,再煮5分鐘,然後熄火,焗10分鐘便可上碟喇。食之前記得落芫茜呀!因為要扮關東煮,所以我唔會打芡囉,話你知,配杯麵真係一流㗎!
你或有興趣的聞西食譜:【單身食錄】蝦米腸變翡翠白玉卷
你或有興趣的其他精選煮題:夠薑食譜、強筋骨湯水、健康特飲